«Ny musikk til distrikta» er eit prosjektsamarbeid mellom tre komponistar frå Vestlandet som ynskjer å gi publikum eit innblikk i noko av det som går føre seg i det kunst-musikalske miljøet i Bergen. Vi meiner det er for lite konsertar med ny og nyare kunstmusikk utanfor dei store byane og har difor ambisjonar om å inspirere til utviklinga av kunstmusikalske miljø i distrikta.
Konserten i Bergen er ein del av ein turné, og den er tenkt som ei utveksling av inntrykk og kunst mellom by og land. Det er lett å tenkje at både kunstmusikk og komponistar høyrer til i byane, der dei store institusjonane er, men vi må ikkje gløyme at det er svært mange komponistar som kjem frå distrikts-Noreg. Vi tenkjer oss at komponistane har med seg inntrykk, kjensler og inspirasjon frå heimstaden sin, og når dette vert omdanna til musikk, høyrer den like mykje til i distrikta som i byane. Lyttaren vil i denne konserten oppleve lydlandskap med både akustiske instrument, elektronikk og video, gjennom nysgjerrig utforsking av potensialet i instrumenta, kombinert med opne, strekte klangflater. Musikken er i kategorien moderne kunstmusikk, og er ei vidareføring av den klassiske kammermusikken.
MUSIKARAR
Njål Vindenes, gitar
Mari Halvorsen, 1.fiolin
Ricardo Odriozola, 2.fiolin
Ilze Klava, bratsj
Matias Monsen, cello
OM KOMPONISTANE
Tor-Erik Hellesen (1979) er komponist og musikar frå Florø, busett i Bergen. Han studerte komposisjon på Griegakademiet (02-10) og avla mastergrad i 2010. Hellesen sin musikk har vorte framført både nasjonalt og internasjonalt, og vert publisert på NB-noter. Hellesen har lang erfaring som komponist og musikar i den kunstmusikalske sjangeren og i andre sjangrar.
Craig Farr (1975) er komponist og musikar frå England, busett i Bergen. Med utdanning frå Griegakade miet i både slagverk og komposisjon er Farr ein aktiv komponist og musikar i tillegg til å ha fast stilling som musikar i Sjøforsvarets Musikkorps.
Solveig Sørheim (1986) er komponist og musikar frå Etne. Ho har studert komposisjon og kyrkjemusikk ved Griegakademiet, og jobbar fast som organist i Etne kommune. Ho kombinerar komponistvirket med frilansing som trø-organist.
Turnéen er støtta av Bergen kommune, Vestland fylkeskommune, Folkeakademiet Hordaland, Folkeakademiet Sogn og fjordane, Avgarde, nyMusikk Bergen og Norsk komponistforening.